يوم السبت 19/3 شفت على قناة دبي ون في برنامج أمباسدور(السفير) في الساعه 1:30 بتوقيت الكويت برنامج عن حياة المهندس ديليب نير سنغافوري من أصل هندي يتكلم عن حياته وإشلون بنى نفسه وتعلم في كندا هندسة ميكانيكية بعدين درس في جامعة هارفرد وإنتقل من مكان لين مكان المهم ما راح اتكلم عنه وايد بس أكثر شي عجبني لمن اتكلم عن حياة الفقراء في سنغافوره وانهم اشلون مهتمين بالعلم وانهم إيمعون فلوس حق دراسة واللبس الدراسي حق إعيالهم لأناقتهم بين الطلبة مع إنهم فقراء وما عندهم فلوس ياكلون وانهم ما يفرطون بسالفة التعليم حق إعيالهم المهم طاف البرنامج وشفته واستمتعت بمعلوماته وإستفدت منه التعليم أهم شي بالنسبة لكل إنسان و رديت وسويت سيرتش عن تعليم الإنترنت والتكنولوجيا لقيت عن إسرائيل وانصدمت انهم متطورين واحنا كلنا نستخدم اجهزتهم وانا ما راح اتكلم عن الشرع بس راح اتكلم عن التكنولوجيا إللي بإسرائيل وإشلون اهمه مطورين وشنو مركزين وعلى أي نواحي مركزين الفلوس والاستثمار ولا التكنولوجيا وآخر التطور والتعليم ؟
! بما معناته الإبتكار في إسرائيل تتوقعون شنو راح يتكلمون إبتكار عن أي موضوع إبتكار البرامج التلفزيونية ولا اسامي البرامج ولا الحكومه مو راضيه اتمشي القرار الفلاني و البدون مو راضين يعطونهم جوازات …الخ ! دش الموقع وشوف المهم راح اترجملكم شنو كاتبين بالصفحه إللي بين قوسين هذا الكلام امترجم من القروب وبعدين ناخذ احسن الافكار أو الابتكارات اللي مسوينهم والمفروض احنا كعرب او مسلمين انطور نفسنا شوي ونفتح مخنا وانطور بنفسنا من هالنواحي اللي اهمه متطورين فيها !!
بالبداية كاتبين( هل تعرف أن الأمريكان اون لاين يأتي من أين ؟ وهل كمبيوترك يشتغل بتقنية انتل سنترينو ؟ وهل تعلم أن أهم الأجزاء من الويندوز الخاصة لك وضعت أين ؟ وأين… وأين …؟ )
( كل هذا مو من قبيل الصدفة)!؟ إسرائيل اهيه اللي سوتها ؟ يعني ما يالك قرار حكومي ولا يايلك البرنامج جاهز وانته مستانس تراني جربت ويندوز 7 اليديد توني مسويله تثبيت أو انستول عند الباكستاني و فرحان آوي يالاخو !! المهم أنا ما راح اقول كل الأمة لازم تاخذ امتيازات ولازم تدرس لا ! انا اقول لازم نبدع ونطور ونهتم بالتكنولوجيا ونبدأ نصنع لأنه كل هذي الشغلات إهيه اللي ترتقي بالامة واللحين عصر التكنولوجيا مو عصر الكلمة والكلام الفاضي لمضيعة الوقت !!
يقولون ( إسرائيل هي معروفه بجميع دول العالم أرقى مستوى التكنولوجيا والابتكار بالعالم !! وتستثمر المليارات في الشركات الإسرائيلية وأن هناك العديد من عمالقة التكنولوجيا مثل مايكروسوفت وأي بي أم و أتش بي و سيسكو و غيرها الكثير لا يمكنهم الاستغناء عن مراكز البحث والتطوير في إسرائيل !! وأنهم لازالوا على توظيف المزيد و المزيد من الموهوبين من خريجين الجامعات الإسرائيلية مثل الجامعة العبرية و التخنيون !! )
أنا ما راح اقولكم قاطعوهم يعني انتوا منوا عشان تقاطعونهم ولا راح اتأثرون بإقتصادهم ولا بإنتجاهم ما راح يهمهم شريتوا ولا ما شريتوا إنتجاهم بأمريكا واليابان أو أي دول ثانيه كافي لهم !! أنا اقول طوروا بنفسكم وصنعوا واخذوا عيوبهم كبداية وطوروا فيها وانتجوا .. بدل الكلام الفاضي واللعب ومضيعة الوقت !! لقيت واحد ماليزي إسمه اونو بروبو مسوي وسيلة نقل معلومات من جدر وملاس وقوطي حليب ليش ما سويتوها ولا شنو احسن منكم بشي يعني لا تتعذرون بالامكانات المالية وانه ماكو فلوس والخ ..يعني بداية المشاريع مو شرط براس مال إذا انت حطيتلك طموح وبتسوي شي يديد اخذ الوسائل اللي حواليك وانتج اول منتج بعدين صنع والمستثمرين وايد وكل الناس تبي تدفع وتستثمر بس مشوار المليون ميل يبدي بخطوه .
وترى التطور التكنولوجي في إسرائيل واقع وإحنا عندنا الإستثمار في بيع التجزئة المهم والأهم عندنا ! اما التصنيع ودعم التصنيع المحلي فهو محاربه كمحاربة المنتجات اليهوديه.
حقائق من المنتجات الإسرائيلية هل تعلم انهم متطورين ولازم انك تستخدم المنتجات حقيقة واقعية والمفروض عليك انك تطور إب هالمنتجات مو انك اتحاربها وتقعد بسعفه وصخله !! طور وابتكر وانتج !!
(1- أكبر مركز تطوير لأجهزة موتورولا موجودة في إسرائيل . ) إحنا عندنا مركز تطوير أجهزه !!
(2- قامت شركة إنتل أربعة مراكز التنمية الرئيسية في إسرائيل – بنتيوم وسنترنوا إسرائيل هي مركز المنشأ لهذه التكنولوجيا . ))
(3- إسرائيل هي واحدة من أعلى النسب المئوية في كيفية إستخدام وتطوير أجهزة الكمبيوتر و الهواتف المحمولة المتطوره للفرد الواحد . )
(4- الجامعات الإسرائيلية معروفة في جميع أنحاء العالم لحرفيتيهم العالية في مجالات العلوم والهندسة ) إحنا وين مكانتنه تطورنا في هذه المجالات ولا ننطر المعاش لين ينزل وماكو اتقان وتطور في الذات في العمل !!
(5- إسرائيل لديها ثالث أعلى معدل من روح المبادرة في العالم وأعلى معدل بين النساء في العالم من بين أكثر من 55 شخصًا في العالم ) أين روح المبادرة والتعاون عندنا وإحنا هذي حالتنا كل واحد يقط أغلاط الغير على الآخر إحذر أخطاء الأخرين !!!!
(6- إسرائيل تحتل المرتبة الثانية في العالم لصناديق رأس المال الإستثماري الصحيح بعد الولايات المتحدة ) يعني اتجاهم وراء التكنولوجيا و التعليم صحيح واحنا مركزين على تصدير النفط يا أخي ركزوا وشغلوا مخكم بالإستثمار الصحيح يا عرب !!!
(7- إسرائيل الدولة الأولى في تطوير برامج حماية الكمبيوتر والإنترنت والحاجز الناري) إحنا إللي علينا إنا نرسلهم الأبديت بفيروسات الكمبيوترات مالتنا وأهمه يطورون في برامجهم وندفع لهم بعد !!! المفروض إنصنع الهند بدأت في تصنيع برامج الحماية مثل كويك هيل .
(8- أول حبة سهلة الهضم فيها كاميرا فيديو تستخدم كبديل طبي للتشخيص من دون الحاجة للمناظير ) فكره سهله ليش ما بديناها إحنا وبدأنا نطورها إحنا العرب عندنا أفكار اكثر منهم بس وين اللي يبدأ بالفكره ويطورها !!
(9- في سنة 2005 زار بيل غيتس عملاق المبرمجين وقال إن إسرائيل هي لاعب رئيسي في عالم التكنولوجيا عالية الجودة والبحث العلمي في حيفا وتشجيع موهوبين التكنولوجيا إلى ما يقرب من مدى وادي السيليكون ) شنو ناقصنا إحنا ما انصير او ندخل عالم التكنولوجيا من حيث التصنيع والبرمجة والتطوير ….الخ !!
(10- إسرائيل هي من الأوائل في العالم من حيث الإبداع الخلاق و التقنيات المطورة ) يعني إحنا العرب ما عندنا هالإمكانيات والمبادرات والأعمال والإبداع !!
عندنا كل شي بس الفرق بينا وبينهم اهمه يعرفون وين وشنو يسون وشنوا أهدافهم ومتى يبدون ومتى ينتهون ودراسات وأبحاث عن كل شي حتى لو كان بسيط !! واحنا مالنا خلق حتى نقرا عنهم !! في الإمارات عندهم مدينة دبي للإنترنت وعندهم واحة دبي للسيلكون وكل شي عندهم بس مركزين على الشركات مثل مايكروسوف اتش بي …الخ وطبعا الشركات بس هدفهم البيع في الوطن العربي وليس التصنيع والتطوير ..الخ آخر همه التطوير بالمنتجات والبحوث العلمية . مع إنه عندهم الخبراء والكفاءات و…و…. بس يفضلون التصنيع في إسرائيل والدول اللي فيها العمالة القليلة بأرخص الأسعار عشان يقللون من تكلفة المنتج على الأقل ليش ما نفتح مركز أبحاث يركز بتطوير الأجهزة الإلكترونية او الكمبيوترات او الإنترنت أو تقنية المعلومات بشكل عام !!! وخل يصنعون بدول ارخيصه مثل الصين والهند و كل هذا تقصير منا وتقصير من كل شخص فينا !! لأنه احنا العرب إنركز بالإستثمار في البيع والشراء وما إنركز في التطوير والإنجازات والموهبة والتقدم في تطوير أحدث تقنيات المعلومات و التكنولوجيا المتطورة والحديثة وما وراء المستقبل !!! كل واحد يبدي يطور بوظيفته وتخصصه واللي يحبه كل واحد له ميوله إللي له ميول بالسيارات خل يبدي يصنع سياره شنو المشكلة و مو بس يصلح سيارات وفرحان آوي !! اللي يحب كمبيوترات خل يبدي يصنع او يطور اجهزه يديده مو يجمع كمبيوتر وفرحان آوي !! وإللي عنده افكار أو إبداع خل يبدي يدونها ويكتبها ويحاول يعطي الأفكار الإيجابية والمستقبليه حق كل فكره بطريقه صحيحه وعلمية ليش لأ مو بس طنازه على العالم وشوف فلان شسوى وفلان شنو شرى !! والطبيب بس مو بس يعالج الناس بالأدوية القديمة لازم يشوف ويطور بنفسه ويشوف شنو المشاكل إللي المفروض يطور فيها و الصيدلي المفروض مو بس يعطي الأدوية لازم يشوف الأدوية ويطور فيها ويحاول يصنع أدويه …الخ وحتى الطباخ يطبخ ويعطي الناس وفتحله مطعم بس ما يبيع منتجات لمطبخه ليش خل ينتج ويبيع ويصدر بعد ليش لأ يعني المنتجات الثانية احسن منى بشنو !! حتى الفراش المفروض يطور بنفسه !! يحاول يصنع مواد تنظيف من لا شئ ويحاول يطور بالمنتجات ليش لأ !!! إللي بوصله كل واحد له تخصصه وكل واحد له مجاله ولازم كل واحد يطور بنفسه وينتج ويبدأ يشتغل ويعمل عشان يتطور واتصير مكانته ومكانة ديرته من الأوائل بين الدول المتطوره ولا منو هذوله اللي احسن منا بالتكنولوجيا !!
لاتنسونا بردود
مشكور مادري كيف شخص يعيش بدون دين
